近年流行網上拍賣，單是香港這彈丸之地，每日在雅虎拍賣網，便有七十多萬件貨有待交易，惟買家欲 bid海外貨品，卻諸多限制，造就代購商店應運而生；甚至有專門代購台灣手信鳳梨酥及鴨舌的網站出現，標榜手信每日新鮮運到香港。
原來，日本及台灣的拍賣網，禁止非當地居民買賣，現年廿五歲的陳歆萱，大學畢業後認為代購店大有錢途，遂找門路替買家代 bid海外貨品，在信和開鋪經營「代購王」。
距離正式營業還有一小時，陳歆萱跟記者在店內訪問，攝影師則爭取時間，着職員拿貨品拍照，惟陳歆萱視線卻一直盯在職員身上，更忍不住多次插嘴，「小心打爛呀」、「呢件貨唔拆得箱」。
見職員不小心將貨品掉亂，陳歆萱立即拉他到一旁訓示，過了十分鐘才回來解釋，「等陣就開始多客，阻到佢哋就唔好啦。」她所以如此緊張，無非是此行競爭激烈，單在信和已有數間同類型店舖，「呢行門檻好低，條橋又容易抄，惟有着重多啲服務啦。」
;)
;)
幫客買鹹書
;)
代 bid店林立，無非是日本等地的拍賣網，只限當地居民交易，況且日本網頁多數沒英文顯示，香港的哈日族惟有透過代購店，才能越洋購買心頭好。陳歆萱指生意模式全靠海外的拍檔，在當地 bid貨，成功投得後再寄回香港，買家等一至兩個星期便可取貨。「最多人買電子零件同相機鏡頭，不過都有啲好另類，例如有人 bid日本出產嘅汽車喉管，仲有個客叫我哋 bid廿幾本鹹書，睇到我眼花。至於老翻貨我哋一定唔接，好似百幾蚊一個 LV袋實係假啦，呢啲錢我唔敢賺。」
香港的代購店，一向專攻代客拍賣日本貨，遲入行的陳歆萱為殺出血路，遂發展台灣市場，「香港近年興起『台風』，好多學生買偶像飛輪海同棒棒堂嘅精品，女仔又鍾意買化妝品，就算計埋運費，都比香港買平。」
現時她代客競投日本、台灣、美國及中國的貨品，客人在網上睇中貨品，首先到其門市付費，包括貨品金額和寄往香港的運費，「一定要收足錢先肯幫佢 bid，唔怕有走數風險，如果 bid唔到就會全數退款。」而貨品的價錢，會以付款當日的匯率計算，不過實際毋須兌換，兼且賺取了匯率差價，「我同當地拍檔，會互相喺自己地區幫對方 bid貨，抵銷番條數多除少補。海外買家鍾意香港出產的精品，好似 GOD嘅衫同袋，都好多人買。不過我每月會俾番幾千蚊日本拍檔，因為日本人好少買香港貨。」
代購店的最大瓣收入，始終是服務費，然而各國的收費有異，例如日本及美國貨，會收取貨價一成，至於台灣及中國則逐件計算，每件最低消費五十元，陳歆萱指因為台灣及中國的貨品售價普遍較平，「以前服務費劃一收貨價一成，但試過有個客託我哋喺台灣 bid七十幾包種子，每包幾蚊，成單生意都係收佢二十蚊，直情蝕做。」她又為網頁加入「自動報價系統」，只要填上貨品的所在地區和金額，便可計算服務費，「等客人可以有預算，感覺君真啲。」
至於市面不少代購店，標榜零服務費，陳歆萱踢爆是混淆視聽，「我哋用貨品重量計算運費，但其他鋪頭好古惑，會用包裝箱大細計運費，明明件貨體積好細，都用大盒包裝，運費變相貴咗，計落都係同一條數。」現時代購王每月約有三百多張訂單，平均每個柯打賺二百多元，扣除開支後，月賺三萬元。
人肉追 bid冧客
陳歆萱坦言這行門檻低，惟有多搞增值服務突圍，她發現中年客最講效率，「佢哋買嘢好疏爽，但要求效率高同追貨快，令佢覺得你有心幫佢 bid到件貨。」曾經有中年客，請她幫手在香港雅虎拍賣網 bid貨，「佢哋唔係唔識上網買嘢，但覺得要成日追 bid，又要約賣家交收好麻煩，寧願俾幾十蚊我賺。」
於大學修讀創意媒體的她，靈機一觸，編寫了一個電腦程式，自動監察客人的競投情況，每逢臨近拍賣尾聲，便發出提示，若發現貨品價格已超越客人訂下的價錢，便會致電客人，問他會否加碼追 bid，「呢個服務好多客都話正，但美國同香港時差大，好多時拍賣完結已經係凌晨，我哋梗係唔會打俾個客啦。」
常客阿明幫襯過多間代 bid店，惟獨對「代購王」讚不絕口，「佢哋好盡責，次次截標前兩分鐘都會打俾我，問我加唔加錢追貨，而且 bid完件貨一至兩個星期就收到；我試過幫襯其他鋪頭，件貨成個月都未見影。」
設計師張先生最近一個月，已幫襯代購王七次，「我一直都想喺 ebay bid貨，但嫌開 paypal戶口麻煩，又驚唔識用，今個月已經喺代購王買咗幾千蚊嘢。」
;)
;)
每月新貨速遞
;)
除此之外，陳歆萱還會主動出擊搵生意，若發現客人對某產品情有獨鍾，便會搜羅相關資料，例如最近有客人常訂購近千元一件的日本達洋貓擺設，她便頻頻監視，有新貨推出便電郵該客，「我會將成個貨品目錄 send俾佢，啲客又會再介紹俾其他朋友，唔少客人直情拎住份目錄，指明買邊件。」
說起冧客心得，陳歆萱滔滔不絕，惟最令她頭痛是如何將寄來的貨品分門別類，因為她和海外拍檔達成協議，成功 bid到的貨品，要直接寄來香港，不能開封，「件貨寄到香港，我哋先會拆箱檢查，如果有損壞，都唔關我哋同海外拍檔事，責任落喺賣家或者速遞公司。」但此舉手續繁複，因為每名拍檔同時間代她拍賣幾十件貨，根本無暇辨別，他們惟有按收據紀錄再慢慢區分。